Infopress

Agjensioni i udhëtimeve “Prime Travel” është biznesi më i ri i familjes së kryetarit të Prishtinës, Isa Mustafa. Ky biznes, që si pronar ka djalin e tij, Besnikun, është i regjistruar si kompani për transport të rregullt ajror. Pronari i ka ikur pyetjes nëse ka licencë apo jo për këtë veprimtari, kurse në Ministrinë e Transportit thonë se “Prime Travel” nuk ka licencë për transport të udhëtarëve dhe as që ka aplikuar për të. Me këtë biznes, familjes Mustafa i bëhen së paku 5 biznese

Ndërmarrja “Marketingu” ka paralajmëruar që më 1 shtator në ora 9:00 do të hyjë në ndërtesën që tash njihet si “Objekti i OSBE-së”, e që ata pretendojnë që katër kate janë të tyre, por OSB-ja ua ka uzurpuar. Ata thonë se këtë ditë do të hyjnë gjithsesi, e për këtë nuk e përjashtojnë edhe përdorimin e forcës

Kompania publike komunale “Trafiku Urban” ka paraqitur para komunës së Prishtinës një raport pune për Komunën e Prishtinës. Në këtë raport, që e posedon “Infopress”, thuhet se kompania ka pasur rënie prej 37 % të të hyrave. Ai është i mbushur me përshkrime për punë me humbje, ndërhyrje të ilegalëve, probleme me punëtorë e suspendim të tyre, mospërfillje të kërkesave, uzurpim prone, mungesë pajisjesh etj. Më shumë sesa një raport pune, dokumenti 15 faqesh i “Trafikut Urban”, i panënshkruar, por që u miratua edhe kështu nga komuna, ngjanë në një tregim të “dhimbshëm” për këtë kompani

Komuna e Prishtinës ka dhënë leje pune për radio-taksinë “City Taxi”, pronarë të së cilës janë Burim Hasani e Gëzim Idrizi. Ky i fundit ka publikuar fotografi në shoqërim të djalit të kryetarit të Prishtinës, Isa Mustafa, Besnikun, dhe dy anëtarëve të kabinetit të tij, Asdren Osaj e Burbuqe Thaçi. Derisa në komunë veç konfirmojnë dhënien e lejes, nuk e komentojnë afërsinë e pronarëve me fëmijët e kryetarit Mustafa

Edhe pse aktualisht nuk ka leje për të investuar, “Benetton Grup”, si pronar i ish-hotelit “Unioni”, ka nisur një fushatë për investimet që do t’i bëjnë në këtë objekt. Ata premtojnë 10 milionë euro investime. Komuna e Prishtinës, që ua pati marrë lejen, thotë së kthimin e saj e kanë në dorë ekspertët e trashëgimisë. Pa marrë parasysh premtimet e “Bentton” për investime, komuna do ta padisë atë për dëmtim të “Unionit” si dhe mosmarrje të masave për mbrojtje të tij

Kompania për menaxhimin e deponive në Kosovë (KMDK) vetëm në tenderin për furnizim me makineri të rëndë ka shkelur së paku katër nene të Ligjit të Prokurimit Publik, tender ky që peshon afro 400 mijë euro. Ai është anuluar për shkak të këtyre shkeljeve, por në KMDK nuk janë deklaruar nëse janë marrë masa ndaj dikujt

Në protestën e “Marketingut” kundër OSBE-së, punëtorët kishin marrë edhe familjarët me vete. Si asnjëherë tjetër në protestat e tyre dalloheshin fëmijët. Por, as kjo nuk ka bërë përshtypje në OSBE, pasi që askush nga ta nuk u paraqit para protestuesve

Protestën e nesërme (e mërkurë) kundër OSBE-së, ndërmarrja “Marketingu” do ta bëjë pos me punëtorë, edhe me familjarët e tyre. “Misioni i OSBE-së në Kosovë këtë radhë do të ketë rastin t’i shohë edhe familjarët tanë, të cilët gjithashtu kanë paguar koston e veprimeve arbitrare të OSBE-së!”, thuhet në komunikatën e “Marketingut”

Fadil Uka, pronar i “Paradisos” thotë që për dëmtimet e pllakave në sheshin “Nëna Terezë” fajtor ishte komuna. Ai, me parallogaritë, konstaton se kompanisë po i dëmtohet për mbi 270 mijë euro, dhe për këtë nuk përjashton mundësinë të bëjë padi kundër komunës. Uka thotë që sigurt do ta padisë komunën, nëse pas përfundimit të punës nuk ia japin afro 400 mijë eurot që ia kanë borxh nga kontrata e parë. Në komunë po presin deri të përfundojnë punimet

Të mërkurën u bë diskutimi publik për planin rregullues për “Qytezën Pejton”. Kësaj here planin e prezantoi udhëheqja e Drejtorisë së Urbanizimit, Luljeta Sokoli - Çeku, por për të foli edhe kryetari i Prishtinës, Isa Mustafa. Derisa ata merreshin me prezantim, qytetarët tregoheshin të padurueshëm me arsyetimin se “janë ngopur me fjalë të kota”