Infopress

Valdrin Krasniqi

Prishtinë, 28 korrik

Hetuesit e policisë së EULEX-it të mërkurën në mëngjes kanë kryer një bastisje në shtëpinë e Azem Sylës, ish-komandant i Ushtrisë Çlirimtare të Kosovës. Bastisja kanë nisur para orës dhjetë në fshatin Kishnarekë të Drenasit dhe sipas EULEX-it ajo ka të bëjë me rastin “Bllaca”.

Blerim Krasniqi, u.d. zëdhënës në Departamentin e Drejtësisë në EULEX, ka bërë të ditur se nën mbikëqyrjen e Prokurorisë Speciale të Kosovës, Policia e EULEX-it ka bastisur shtëpinë e ish-komandantit të UÇK-së. Ai tha se kjo bastisje është e lidhur me hetimet në rastin “Bllaca”.
Bastisja është autorizuar nga gjykatësi i procedurës paraprake i Gjykatës së Qarkut në Prishtinë.
Një prokuror special i EULEX-it ka qenë i pranishëm në vendin e ngjarjes për të siguruar mbledhjen e efektshme të materialit dëshmues dhe të japë shpjegime të plota për personat e pranishëm në vendngjarje.

Pas përfundimit të bastisjes, EULEX-i i ka bërë ftesë Sylës që të paraqitet në Prokurorinë Speciale. Bastisja ka zgjatur rreth tri orë pandërprerë, ndërsa është parë që nga aty hetuesit kanë marrë disa dokumente.

Hetuesit kanë qenë në rroba civile dhe të pamaskuar, ndërsa Policia e Kosovës nuk ka qenë e informuar fare për këtë bastisje. Arbër Beka, zëdhënës i Policisë së Kosovës, ka deklaruar se për këtë bastisje nuk kanë pranuar asnjë kërkesë nga EULEX-i për asistim.

Ish-komandanti i UÇK-së me nofkën “Daja”, aktualisht ndodhet për pushime jashtë Kosovës, mirëpo i njëjti është ftuar të paraqitet në Prokurorinë Speciale më së largu deri më datën 4 gusht të këtij viti.

Vendose në: