Infopress

Vlora Toçilla

Ferizaj, 28 korrik

I pranishëm në ushtrimin e djeshëm të ushtarëve të KFOR-it amerikan, pjesëtarëve të Policisë së Kosovës dhe atyre të EULEX-it, kryetari i Komunës së Ferizajt, Bajrush Xhemaili, ka thënë se përcjellja e këtij ushtrimi nga afër ishte mjaft interesante. “Është mirë që mbahen këto ushtrime, në kuptimin e trajnimit të policisë për sfida të tilla, të cilat mund të ndodhin në çdo kohë dhe çdo herë. Policia u tregua shumë e aftë në këtë rast”, ka thënë Xhemaili, duke i uruar sukses policisë në kryerjen e detyrave dhe në mbrojtjen e ligjit. Edhe kryetari i Komunës së Shtimes, Naim Ismajli, ka thënë se ky ushtrim pasqyron më së miri bashkëpunimin e Policisë së Kosovës dhe KFOR-in, e cila është në të mirë të ngritjes së kapaciteteve të Policisë së Kosovës.

Policia e Kosovës, përgjegjësja e parë për sigurinë

Ushtruesi i detyrës së Drejtorisë Rajonale të PK-së, major Rashit Qalaj, ka thënë se, Policia e Kosovës me ndihmën e institucioneve tjera të sigurisë bën menaxhimin e trazirave, varësisht nga niveli i rezistencës që protestuesit ofrojnë. “Ne fillimisht reagojmë me policë të rendit, ndërsa me rritjen e rezistencës, ne dërgojmë njësitë tona elite të njësisë speciale që të menaxhojnë me turmat”, ka thënë Qalaj. Sipas tij, Policia e Kosovës, gjithnjë është e para dhe përgjegjëse për sigurinë në Kosovë, por ekzistojnë edhe momente kur kërkohet ndihma edhe nga pjesëtarët e EULEX-it dhe nga KFOR-i.

Koloneli Francisco Neuman, komandant i Grupit Shumëkombësh të Betejës-Lindje, ka thënë se kjo ishte stërvitja e parë që po bëjnë si GSHKB-Lindje të KFOR-it 13 dhe ushtrimet të tilla do të vazhdojnë edhe në të ardhmen. “Ushtrimi sjell deri tek përsosmëria dhe pikërisht kjo është ajo që ne do të bëjmë, duke bashkëpunuar në formë të ndërsjellë në mes Policisë së Kosovës, EULEX-it dhe KFOR-it”, ka thënë Neuman, duke shtuar se edukimi i tij paraprak është në policinë ushtarake dhe do të vazhdojë në këtë drejtim edhe në të ardhmen.

Vendose në: