Infopress

Beadin Syla

Prishtinë, 26 korrik

Kryeministri Hashim Thaçi ka thënë para ligjvënësve të hënën se opinioni i GJND-së ka hapur perspektivën e Kosovës drejt integrimit në strukturat euroatlantike, dhe organizata të tjera ndërkombëtare. Ai ka ritheksuar se ky opinion ka vulosur pavarësinë e Kosovës, duke respektuar vullnetin e qytetarëve të Kosovës për të shpallur Kosovën shtet të pavarur dhe sovran më 17 shkurt 2008 dhe ka legjitimuar në gjithë botën pavarësinë e Kosovës. “Opinioni i GJND-së ishte një fitore historike për shtetin dhe popullin e Kosovës, por edhe për gjithë rajonin. Ky mendim nuk është i drejtuar kundër askujt, por është në dobi të drejtësisë, paqes, stabilitetit dhe gjithë neve që jetojmë në rajon dhe më gjerë”, ka thënë Thaçi. GJND-ja sipas Kryeministrit i dha përgjigje të drejtë gjithë botës mbi të drejtën e luftës së popullit për çlirim, liri dhe shtet. “Opinioni i GJND-së është i qartë ashtu siç ishin të qarta përpjekjet tona për liri dhe pavarësi. Ky mendim ka legjitimuar çdo përpjekje dhe angazhim politik e ushtarak, individual dhe kolektiv të qytetarëve tanë gjatë shekujve për liri dhe pavarësi. Prandaj, sot secili nga ne, por edhe secili qytetar i Kosovës kudo që jeton duhet të ndihet mirë dhe krenar me këtë të arritur”.

Tani fokusi në zhvillim

Kosova sipas Kryeministrit, tani do të vazhdojë të bëjnë më tepër për zhvillimin ekonomik, infrastrukturën, edukimin, shëndetësinë, dhe krijimin e vendeve të reja të punës. Ai tha se opinioni i GJND-së ka hapur perspektivën evropiane për procesin e liberalizimit të vizave, për marrëdhënie tregtare me BE-në dhe procesin e stabilizim-asocimit, por para se gjithash atë të integrimit të Kosovës në NATO, BE, dhe në OKB. “Në të njëjtën kohë dëshiroj të theksoj se gjatë kësaj periudhe edhe në vizitën time që kisha në SHBA, u rikonfirmua edhe një herë mbështetja e jashtëzakonshme për shtetin e Kosovës nga Qeveria e SHBA-së, për Qeverinë e Kosovës, për qeverisjen e mirë dhe transparente, për sundimin e ligjit, të luftës së pakompromis kundër korrupsionit, krimit të organizuar dhe për vizionin tonë për ndërtimin e shtetit demokratik, multietnik, me territor të pacenueshëm të Kosovës”, ka shtuar shefi i ekzekutivit. Ai ka ritheksuar se pavarësisë së mbikëqyrur po i vjen fundi.

Më shumë përgjegjësi institucionale

Kryeministri, duke folur për opinionin e GJND-së, ka thënë se ai ka prekur edhe kujtesën për të gjithë ata njerëz që sakrifikuan për lirinë e shtetit të Kosovës. Ai sipas tij, ka forcuar bindjen se rruga e respektimit të drejtësisë ndërkombëtare dhe orientimit të drejtë si shtet, ishte e drejtë, por se ka sugjeruar që të vazhdohet me këtë bindje, këtë orientim dhe me këtë punë. “Ky mendim rrit përgjegjësinë e institucioneve për forcimin e shtetit, për konsolidimin e tij, për trajtim të barabartë të të gjithë qytetarëve, për plotësim të zotimeve tona para botës demokratike te të gjitha kritereve dhe sjellje serioze në çdo rast që çdo qytetar yni të jetë krenar me shtetin e Kosovës, duke u zhvilluar krah kombeve të botës së lirë”, është shprehur kreu i Qeverisë.

Vendose në: