Infopress

Valdrin Krasniqi

Prishtinë, 21 korrik

Është identifikuar personi i vrarë të martën pasdite në Gërmi të Prishtinës nga një oficer policie. Sipas policisë, i vrari është B. S., 35-vjeç nga Fushë Kosova me vendbanim në Prishtinë. I vrari, një ditë më herët (e martë) dyshohet se i maskuar dhe i armatosur ka tentuar të plaçkitë një zyrtar policor, derisa ky i fundit ishte jashtë detyre dhe kishte dalë për të shëtitur në rroba civile. Trupi i pajetë i të vrarit me urdhër të prokurorit publik është dërguar për autopsi në Institutin e Mjekësisë ligjore në Prishtinë, përderisa polici është ndalur në qendrën e paraburgimit derisa të qartësohet gjithçka rreth rastit.

Sipas kapiten Baki Kelanit, shef i Zyrës për Marrëdhënie me Publikun në Policinë e Kosovës, vrasja ka ndodhur të martën, rreth orës 17:00 në Gërmi të Prishtinës, tek vendi i quajtur te antenat.

“Derisa një zyrtar policor, jashtë detyrës dhe në rroba civile, po qëndronte në Gërmi, një i dyshuar i armatosur me një revole të tipit TT dhe i maskuar i ishte afruar policit nga dera e pasagjerit duke i kërkuar të holla”, thotë kapiteni. Mësohet se i dyshuari pasi që ka grabitur një telefon mobil nga brendia e veturës e ka sulmuar fizikisht policin duke i shkaktuar lëndime trupore.

Në bazë të hetimeve fillestare, besohet se pas kësaj zyrtari policor e ka nxjerrë revolen e tij dhe pasi që personi i maskuar dhe i armatosur nuk iu ka përfillë urdhrave verbale dhe ligjore për ndalim, zyrtari policor e ka përdor revolen e tij zyrtare duke qëlluar në të dyshuarin.

Njësitet përkatëse të policisë menjëherë kanë dalë në vendin e ngjarjes përderisa ekipi mjekësor që ishte po ashtu prezent në vendin e krimit, konfirmoi vdekjen e të dyshuarit.

Me urdhër të Prokurorit të Qarkut, zyrtari policor i është caktuar masa e ndalimit policor si vazhdimësi e procedurave të rregullta hetimore, ndërsa Drejtoria e Krimeve të Rënda në bashkëpunim me Prokurorin e Qarkut është në vazhdimësi të këtij procesi hetimor.

Vendose në: