Infopress

Bahri Bivolaku

Vushtrri, 21 korrik

Zyrtarë të Komunës së Vushtrrisë kohë më parë nga Agjencioni Kosovar i Pronave (AKP), kishin kërkuar që objektet e banimit të ndërtuara në vitet e 90-ta për refugjatët serbë nga Kroacia, t'i ktheheshin në posedim dhe menaxhim të komunës, pasi edhe ishin ndërtuar në pronën komunale. Në fshatin Lumëmadh të Vushtrrisë vitet 1993-1994 janë ndërtuar 55 objekte banimi të madhësive nga 40 metra katrorë e gjerë në 80 metra katrorë. Objektet e ndërtuara aso kohe në fillim kishin karakterin e strehimit për kategoritë sociale, por që më vonë atyre u ndërrohet destinimi, pasi pushteti serb ua dha në shfrytëzim kryesisht të zhvendosurve serbë nga Kroacia, e veçanërisht atyre nga rrethina e Kninit. Me qëllim të ndërrimit të strukturës së popullsisë, ky pushtet këtyre kolonëve, përveç që i punësoi në kolektivet punuese, të cilat nga shqiptarët pastroheshin, ua siguroi edhe kushtet e banimit. Të gjitha këto objekte të banimit janë të ndërtuara në pronën komunale me numër të certifikatës UL-70202011-00070, ndërsa numri i parcelës së ndarë, është diku rreth 6 hektarë me të cilën vërtetohet si pronë e paluajtshme komunale është P-70202011-00435-3-1. Aktualisht mbi këto objekte dhe këtë pronë Komuna nuk ka fare qasje siç nuk ka edhe informacione as formën e menaxhimit të tyre. Nuk kemi asnjë dokumentacion zyrtar lidhur me ato prona dhe shfrytëzimin e tyre në komunë, thotë zyrtari ligjor i komunës, Enver Morina. Drejtori në Drejtorinë Komunale të Katastrit, Nezir Klinaku, përveç sigurimit të dokumentacionit që kanë të bëjnë me vërtetimin e pronësisë së tokës, ai ka idenë që në bisedime me Agjencionin Kosovar të Pronave për të bërë zgjedhje në interesin e qytetarëve të Komunës. Kuvendi Komunal do të duhej të ketë një qëndrim për pasurinë e vet dhe të mendojë që në bisedime trepalëshe Komuna, AKP-ja dhe qeveria, ato prona dhe objekte të banimit t’i kthehen në menaxhim Komunës, thotë Klinaku", kështu thuhet në shkrimin e 25 marsit të këtij viti, ndërkaq sot zyrtarëve komunalë nga Scott Bower, drejtori ekzekutiv i AKP-së, u ka ardhur konfirmimi për fillimin e bisedimeve për dakordimin dhe gjetjen e mënyrës së bartjes së 55 pronave të lëndëve inventare Komunës së Vushtrrisë.

Kthimi i pronës me ligjin për financimin e programeve të veçanta për banim

" Banesat e ndërtuara para marsit 1999 nga organizatat humanitare ndërkombëtare për strehimin e refugjatëve do të bëhen pronë e komunave, në të cilat ato gjenden. Familjet që do të vendosen në këto banesa do të përzgjidhen sipas kritereve të këtij ligji", është citat nga ligji i 25 shkurtit të vitit 2010 të nxjerrë nga Kuvendi i Kosovës, që rregullon materien për financimin e programeve të veçanta për banim, në bazë të së cilit objektet banesore të ndërtuara për refugjatët serbë nga Kroacia e viteve të 90-ta në Komunën e Vushtrrisë, Junikut, Deçanit dhe Fushë Kosovës duhet t'u kthehen në posedim dhe menaxhim komunave përkatëse. Mu për këtë shkak, drejtori ekzekutiv i AKP-së, Scott Bower me anë të një shkrese ka kërkuar edhe takimin me kryetarin e Komunës, Bajram Mulaku, për t'i diskutuar për mënyrën e bartjes së këtyre pronave. "Deri më sot ligji i cekur nuk është publikuar në gazetën zyrtare, megjithatë AKP-ja do të dëshironte të diskutojë dhe të bie dakord mbi mënyrën se si t'i barten 55 prona të lëndëve invetare Komunës së Vushtrrisë", thotë Scott Bower.

Vendose në: